लंडन, दि. १ (वृत्तसंस्था) – ब्रिटनमधील वाढत्या गुन्हेगारीला आळा घालण्यासाठी २० हजार अतिरिक्त पोलिसांची तैनाती करण्यात येणार असून येत्या तीन वर्षात ही प्रक्रिया पूर्ण होईल, अशी घोषणा पंतप्रधान बोरिस जॉन्सन यांनी केली. ब्रिटनमध्ये गेल्या काही वर्षात ‘नाईफ क्राईम’सह हिंसक गुन्ह्यांचे प्रमाण भयावहरित्या वाढल्याचे समोर आले होते. या वाढत्या गुन्हेगारीमागे पोलीसदलातील कपात व अपुरी आर्थिक तरतूद ही कारणे समोर आली होती.

गेल्या आठवड्यात पंतप्रधानपदाची सूत्रे हाती घेणार्‍या जॉन्सन यांनी अंतर्गत सुरक्षा व संरक्षणविभागासाठी आक्रमक धोरण राबविण्याची घोषणा केली होती. अंतर्गत सुरक्षेसाठी पोलीसदलावर भर देण्याची घोषणा करतानाच देशात पहिल्यांदाच ‘नॅशनल पोलिसिंग बोर्ड’ची स्थापनाही करण्यात आली होती. या बोर्डाची पहिली बैठक बुधवारी पार पडली. यावेळी ब्रिटनच्या गृहमंत्री प्रीति पटेल, ‘नॅशनल क्राईम एजन्सी’चे संचालक जनरल लिन ओवेन्स यांच्यासह देशातील वरिष्ठ पोलीस अधिकारी उपस्थित होते.

‘ब्रिटनमधील गुन्हेगारीचे प्रमाण खाली आणणे आवश्यक आहे. काही प्रमाणात यात यश येत असले तरी अनेक बाबतीत चुकीच्या दिशेने वाटचाल सुरू आहे. आपण सर्व मिळून यातून मार्ग काढू शकतो आणि त्यासाठी मजबूत पोलीसदलाला प्राधान्य द्यायला हवे’, असे सांगून जॉन्सन यांनी २० हजार अतिरिक्त पोलिसांची भरती व तैनातीची माहिती दिली. येत्या तीन वर्षात ही प्रक्रिया पार पडेल व ब्रिटन सरकार त्यासाठी आवश्यक निधी उपलब्ध करून देईल, असा दावाही पंतप्रधान जॉन्सन यांनी केला.

ब्रिटीश पंतप्रधानांच्या या घोषणेच्या पार्श्‍वभूमीवर ब्रिटनच्या संसद सदस्यांनी शाळांमध्ये व नजिकच्या परिसरात अतिरिक्त पोलीस तैनातीची मागणी पुढे केली आहे.

English   हिंदी

या बातमीबाबत आपले विचार आणि अभिप्राय व्यक्त करण्यासाठी खाली क्लिक करा:

	https://twitter.com/WW3Info
	https://www.facebook.com/WW3Info