सेऊल – पाणबुडीतून क्षेपणास्त्र प्रक्षेपित केल्याची घोषणा उत्तर कोरियाने केली. आपल्या लष्करी सामर्थ्यात वाढ आणि शत्रूंच्या कारवायांना आवर घालण्यासाठी ही चाचणी महोती, असे उत्तर कोरियाने जाहीर केले. उत्तर कोरियाच्या या क्षेपणास्त्र चाचणीवर जपान, दक्षिण कोरिया आणि अमेरिकेने चिंता व्यक्त केली आहे.

उत्तर कोरियाच्या लष्कराने बुधवारी पूर्वेकडील सागरी क्षेत्रात क्षेपणास्त्र प्रक्षेपित केल्याची माहिती दक्षिण कोरियन लष्कराने प्रसिद्ध केली होती. पहिल्यांदाच आपल्या शेजारी देशाने पाणबुडीतून मध्यम पल्ल्याचे क्षेपणास्त्र प्रक्षेपित केल्याचा दावा दक्षिण कोरियाने केला होता. गुरुवारी उत्तर कोरियाने या चाचणीची माहिती जाहीर केली. ‘पुकूक्साँग-३’ या नव्या क्षेपणास्त्राची पाणबुडीतून चाचणी घेतली. पुकूक्साँग-३ क्षेपणास्त्र जपानच्या सागरी हद्दीजवळ कोसळल्याचा दावा केला जातो. आतापर्यंत उत्तर कोरियाने मोबाईल लाँचर्सवरुन क्षेपणास्त्रांची चाचणी केली होती. पण पहिल्यांदाच पाणबुडीतून बॅलेस्टिक क्षेपणास्त्राची चाचणी घेऊन उत्तर कोरियाने मोठा धक्का दिला आहे.

या क्षेपणास्त्र चाचणीच्या काही तास आधी उत्तर कोरियाने अमेरिकेला चर्चेचा प्रस्ताव दिला होता. सहा महिन्यानंतर पुन्हा एकदा अमेरिका आणि उत्तर कोरियामध्ये चर्चा सुरू होणार असल्याचे बोलले जात होते. जपाननेदेखील या चर्चेचे स्वागत केले होते. तसेच आपणही उत्तर कोरियाशी चर्चा करण्यासाठी उत्सुक असल्याची प्रतिक्रिया जपानने दिली होती. पण उत्तर कोरियाच्या या चाचणीनंतर पुन्हा एकदा कोरियन क्षेत्रात तणाव निर्माण झाला आहे.

English   हिंदी

Click below to express your thoughts and views on this news:

	https://twitter.com/WW3Info
	https://www.facebook.com/WW3Info